(فاضل إيه يا بلادنا الحرة )..../رأفت يوسف
غمي عنيكي
وأوعي تشوفي اللي أنا شيفاه ............
جفت أرض بلادي الخضرا
اصبح دم أخويا رخيص
ماتت كل معاني الدنيا من جواه ............
أصبح نور الدنيا دا عتمه
ودع قمر الليل نجماته
غاب الضي في وسط سمااه ...........
ماتت كل معاني الفرحه
وسط حصار علي شعبي العربي
جوع تشريد بعد ربيع أحنا شربناه ..............
نادت كل سنابل القمح الدابله
في فلسطين بتقول فينك يا قدساه ...............
سمع صوتها نهر فراتنا اللي في بغداد
هبت ريح اليمن الشارده
سمع بين وديانها الآه .....................
سكنت فرقه أخواتنا في ليبيا
دم أخوك في طرابلس سال
دين في رقبتك ماهتنسااه ....................
وجعي عليك يا اخويا في سوريا
دمك شبع أرض بلادي
بين طرقات أدلب وحماه ....................
غمي عنيكي يا دميه في أيدي
أنا بايديا هاغمي عنيكي
عشان ماتحسي اللي أنا حسااه .................
صوت صواريخ وبارود ومدافع
غطت بدل الخضرا بلادي
خدت الحلم في إيدها معااه ................
رغم جمادك رغم إنك مش دم ولحم
لكن صرخه طفل شريد من بيت لحم
أو حره علي أرض بلادي
أتعرت وسط عيون أخواتها
سنين م السحل تخلي الميت يصحي
يعود من تاني علي دنياه ........................
رغم إنك شيفاني وحيده
وعن أرضي وعن بيتي بعيده
بعد ما راحت أمي وأبويا
وسط حروب أحنا اخترناها بصمت وجبن
ومر في جوفنا احنا ارتضناه ........................
لكن خوفي سكني تملي
من غير ما اقصد حطيت إيدي
باغمي عنيكي كأنك زيي الروح سكناكي
خفت لاتسكن قلبك زيي
نار علي شعبي وأرض بلادي
في كل الدنيا اتشرد تاااه ......................
فاضل أيه يابلادنا الحره
فاضل غير العيشه المره وقولة اااااااه ..............
،،،،،،،،،،،،،،،،،،،،،،،،،،،،،،،،،،،،،،،،،،،، بقلمي/رأفت يوسف
ليست هناك تعليقات:
إرسال تعليق